sham-e-furqat mila ye sahara mujhe
barha be-kasi ne pukara mujhe
aa gaya haath men jam-e-kaif-afrin
mil gaya hijr-e-gham ka kinara mujhe
kar gaya be-niyaz-e-gham-e-in-o-an
un ki dilkash nazar ka ishara mujhe
inqalab-e-mohabbat ye kya ho gaya
un ka gham bhi nahin ab gavara mujhe
tere jalvon ko thi jab miri justuju
yaad hai aaj tak vo nazara mujhe
laakh ho zer phir bhi gham-e-zindagi
sau saharon ka hai ik sahara mujhe
roz-afzun hai bechargi ishq ki
sujhta hi nahin koi chara mujhe
kah diya un se ‘parvez’ sab hal-e-dil
ḳhamushi de ga.i hai sahara mujhe
Leave a Reply