ham se ulfat jata.i jaati hai
be-qarari baḌha.i jaati hai
dekh kar un ke lab pe ḳhanda-e-nur
niind si gham ko aa.i jaati hai
gham-e-ulfat ke kar-ḳhane men
zindagi jagmaga.i jaati hai
un ki chashm-e-karam pe naaz na kar
yuun bhi hasti miTa.i jaati hai
bazm men dekh rang-e-amad-e-dost
raushni tharthara.i jaati hai
dekh ai dil vo uTh rahi hai naqab
ab nazar azma.i jaati hai
un ke jaate hi kya hua dil ko
sham.a si jhilmila.i jaati hai
teri har ek baat men ‘ehsan’
ik na ik baat paa.i jaati hai
Leave a Reply