Muzaffar Warsi
gahra.iyon men zehn ki girdab sa raha
sahil pe bhi khaḌa hua gharqab sa raha
be-nam si ik aag jalati rahi mujhe
ḳhuun ke baja.e jism men tezab sa raha
ḳhali vajud hi liye phirta raha magar
kandhon pe umr bhar mire asbab sa raha
naghme bikherta raha ehsas-e-talḳh bhi
ḳhama bhi mere haath men mizrab sa raha
ashkon men us ke husn ki lau tairti rahi
paani ke asman pe mahtab sa raha
kaam aa.i sha.iri bhi ‘muzaffar’ ke kis qadar
tanha.i men bhi majma-e-ahbab sa raha
Leave a Reply