Poet
tujh bina dil ko be-qarari hai
dam-ba-dam mujh ko ah-o-zari hai
haath tere jo dekhi hai talvar
aarzu dil ko jan-sipari hai
mujh ko auron se kuchh nahin hai kaam
tujh se har dam umid-vari hai
ham se tujh ko nahin milap kabhi
ye magar jag men taur-e-yari hai
aah kuun dil men main chhupata huun
lazim-e-ishq parda-dari hai
gir raha teri raah par ‘faez’
ishq ki shart khaksari hai
Leave a Reply