mahaz-e-ilm pe chhaya hua andhera hai
ḳhirad ki raah ko divangi ne ghera hai
chaman ki ḳhaak men ibrat ki dastanen hain
sisak rahi hain baharen ḳhizan ka Dera hai
charagh-e-dair-o-haram jal ga.e magar ab bhi
jidhar nigah uThao udhar andhera hai
samundaron pe sitaron pe nazm-e-alam par
na iḳhtiyar tumhara hai aur na mera hai
hazar rang bhari zindagi pe naaz na kar
qadam sambhal ke uTha maut ka andhera hai
ye aate jaate hue ajnabi na samjhenge
gada-nasib bata de kidhar ka phera hai
ye kachchi niind ki ankhen ye surmagin tevar
andheri raat ke daman men bhi savera hai
qadam qadam pe vafa ke diye jala ke chalo
suna hai ‘fazl’ adam men bahut andhera hai
Leave a Reply