ḳharab ho gaya jab mere jism ka kaghaz
to meri ruuh ne pahna hai dusra kaghaz
guzar di hai yuun hi joḌte ghaTate hue
saval hal na hue aur bhar gaya kaghaz
gharib-e-shahr huun ghar hai na karobar koi
kabhi bichhata kabhi oḌhta raha kaghaz
huruf raqs-kunan ho ga.e achanak hi
labon se apne jo us ne kabhi chhua kaghaz
vo din bhi yaad hain ham ko tumhare hijran men
hamare beach men jab rabta bana kaghaz
use jo naav banaya to gharq-e-ab hua
kuchh aur der to lahron se khelta kaghaz
adalaton men bhi jhuTi gavahiyon ke liye
tamam-umr zaban kholta raha kaghaz
futur zehn men bhar kar havas ke nezon par
uchhalta raha ham ko haram ka kaghaz
Leave a Reply