saa.e men ablon ki jalan aur baḌh ga.i
thak kar jo baiThe ham to thakan aur baḌh ga.i
kal is qadar tha habs hamare makan men
sanki hava zara to ghuTan aur baḌh ga.i
kanTon ki guftugu se ḳhalish dil men kam na thi
phulon ke tazkire se chubhan aur baḌh ga.i
ye baghban hamare lahu ka kamal hai
nairangi-e-bahar-e-chaman aur baḌh ga.i
ye hijr ki hai aag mizaj us ka aur hai
ashkon se sho.alagi-e-badan aur baḌh ga.i
sairab kar saka na use mera ḳhuun bhi
kuchh tishnagi-e-dar-o-rasan aur baḌh ga.i
harf-e-sipas pesh kiya jab bhi vo mila
lekin jabin pe us ki shikan aur baḌh ga.i
tahrir ki jo ek ghazal us ke naam par
‘ejaz’ abru-e-suḳhan aur baḌh ga.i
Leave a Reply