Imran Aami
kuchh ehtimam na tha sham-e-gham manane ko
hava ko bhej diya hai charagh laane ko
hamare ḳhvab salamat rahen tumhare saath
ye baat kaafi hai duniya ki niind uḌane ko
hamara ḳhuun kisi kaam ka nahin bhaa.i
ye paani Thiik hai lekin diye jalane ko
hamari raakh yunhi to nahin kuredte log
hamare paas koi baat hai chhupane ko
tire baghair bhi ham ji rahe hain aur ḳhush hain
ye baat kam to nahin hai tujhe jalane ko
hamare ḳhuun se luThḌe hue hain haath us ke
hamare saath mohabbat bhi hai zamane ko
vo jin ke paas koi aks bhi nahin ‘ami’
taḌap rahe hain mujhe a.ina dikhane ko
Leave a Reply