Hamida Shahin
pyaar isar vafa sher-o-hunar ki baten
ab to lagti hain kisi aur nagar ki baten
koi surat na riha.i ki bani to jaana
ham to divar se karte rahe dar ki baten
vaqt aaya to zabanon ko bhi jumbish na hui
log karte the bahut tegh ki sar ki baten
ye hain maghrur parinde unhen Darne do abhi
baiTh ja.enge agar chheḌ den ghar ki baten
ḳhaak se joḌ liya hai vo ta.alluq ki hamen
raas aati nahin shams-o-qamar ki baten
paanv resham ke gadilon se utarte hi nahin
aur har-vaqt hain kanTon pe safar ki baten
asman dekh ke ‘shahin’ ye dil chahta hai
koi karta rahe parvaz ki par ki baten
Leave a Reply