na Dare barq se dil ki hai kadi meri aankh
us ki zanjir-e-talai se ladi meri aankh
apne bimar ko rakhti hai chhupa kar tah-e-khak
kahte hain sahab-e-ghairat hai badi meri aankh
khaak men mil ke ayaan huun gul-e-nargis ban kar
dekh le gar tiri phulon ki chhadi meri aankh
is tarah zabh kiya tegh-e-nigah se mujh ko
khud vo kahte hain ki zalim hai badi meri aankh
dil men hai kuchh asar-e-josh-e-mohabbat ab tak
tar hui dekh ke savan ki jhadi meri aankh
hasrat-e-did men pathra ke bani sang-e-dar
na hati phir tire dar par jo adi meri aankh
raat bhar ashk ke danon pe gina karti hai
furqat-e-yar men ek ek ghadi meri aankh
dil ke tukde miri palkon men jo dekha to kaha
janti thi inhen phulon ki chhadi meri aankh
rakh liye pesh-e-hubab-e-lab-e-ju munh par haath
nazar aai unhen dariya men padi meri aankh
daud kar mujh se gale mil gae milte hi nazar
dil ki taqdir ladi ya ki ladi meri aankh
ai shab-e-vasl na maalum ye kya kar gai tu
band hoti nahin ab koi ghadi meri aankh
kahte hain aankh ladate hi tu patthar ban jaae
hai tira dil to bahut narm kadi meri aankh
yad-e-khal-e-rukh-e-janan ki madad se naseh
shab furqat ke sitaron se ladi meri aankh
ho gai fart-e-nazakat se haya ki shohrat
aa gaya un ko pasina jo ladi meri aankh
hai jo ashkon men udahat to na ghabra ai dil
roi hai dekh ke missi ki dhadi meri aankh