Khaqan Khavar
shaḳh se patte parinde ashiyan se ja chuke
kaisi rut hai sab makin apne makan se ja chuke
main ḳhalaon men bhaTakne ko akela rah gaya
mere sathi chand-tare asman par ja chuke
ḳhushk patte uḌte phirte hain yahan ab ja-ba-ja
rang-o-nik.hat ke musafir gulsitan tak ja chuke
tere qaabu men the jab tere the ab tere nahin
uḌ ke ab alfaz ke panchhi zaban se ja chuke
kah rahe hain dard men Duube hue divar-o-dar
DhunDte phirte ho jin ko tum yahan se ja chuke
zindagi men dekhne the ye bhi din ‘ḳhavar’ hamen
jo kabhi bichhḌe na the vahm-o-guman se ja chuke
Leave a Reply