Poet
arasta bazm-e-aish hui ab rind piyenge khul khul ke
jhukti hai surahi saghar par naghme hain faza men qulqul ke
aa tujh ko bana duun rashk-e-chaman mizan-e-mohabbat men tul ke
aariz ko gulon ki ra.ana.i bal zulf ko baḳhshun sumbul ke
gulshan men bahar aa.e ki ḳhizan murjha.e kali ya phuul khilen
sayyad tujhe kya matlab hai tu ashk gine ja bulbul ke
ham ahl-e-chaman ki nazron men kuchh aur hi ma.ana rakhta hai
kaliyon ka chaTak kar khil jaana phulon ka nikharna dhul dhul ke
vo chain to shayad rizvan ko jannat men kya milta hoga
jo mujh ko sukun mil jaata hai saa.e men kisi ki kakul ke
ushshaq ke marne jiine ko itni hi lagavaT kaafi hai
ik choT si tirchhi nazron ke do chaar jhakole kakul ke
kaun us ki fazaon men aa kar taḳhrib ke sho.ale phunk gaya
aḳhir ye vahi to gulshan hai rahte the jahan ham mil-jul ke
is daur ke pagal insanon nafrat ki faravani kab tak
gar aaj nahin to kal tum ko rahna hi paḌega mil-jul ke
gar had se siva pi loge ‘falak’ phir hosh kahan mai-ḳhane ka
do-char hi qatre kaafi hain pichhe na paḌho jam-e-mul ke
Leave a Reply