Raziya Subhan
makan se duur kahin la-makan men rahti huun
zamin pe hote hue asman men rahti huun
hai jis ke haath men ye bag-Dor aalam ki
bahut sukun se us ki amaan men rahti huun
ḳhabar jo lene chale ho ye halat-e-dil hai
mujhe ḳhabar hi kahan kis jahan men rahti huun
varaq varaq pe hain phaile huruf-e-na-bina
mohabbaton ki har ik dastan men rahti huun
husul-e-ishq ki sab kavishen hain la-hasil
main dastaras se pare ik jahan men rahti huun
har ik talab se hui be-niyaz-o-begana
basa ke dil men use astan men rahti huun
safir ban ke havaon ki duur tak ja.un
main musht-e-ḳhak huun mauj-e-ravan men rahti huun
Leave a Reply