Shams Fareedi
jab bhi salib par koi iisa dikha.i de
saari faza men nuur bikharta dikha.i de
is chandni ki zad se bacha le koi mujhe
mera hi saaya mujh ko Darata dikha.i de
poshida ka.enat hai is sar-zamin men
dekho ise jo duur se nuqta dikha.i de
is shahr-e-dard-o-dagh men kis kis ko DhunDiye
har shaḳhs apne aap men chhupta dikha.i de
ai shams’ muntazir huun main sahil pe shaam se
badal haTe to chand ka mukhḌa dikha.i de
Leave a Reply