muntazir baiThe hue hain shaam se
aur ham vaqif bhi hain anjam se
mil ga.e jab tum to kaisa kaam phir
ghar se ham nikle the yuun to kaam se
aa miri gahra.iyon men Duub ja
kah rahi hai ye surahi jaam se
bhar gaya kanTon se daman pyaar men
dil mira vaqif na tha anjam se
rafta-rafta sub.h tak sab bujh ga.e
vo diye jo jal uThe the shaam se
le ga.e vo ik nazar men naqd-e-dil
luTne vaale luT ga.e aram se
kyon na ho maqbul ‘rahbar’ mere sher
likh raha huun haT ke rah-e-am se
Leave a Reply