Azhar Ghauri
jaane kitnon ke liye rashk ka mehvar Thahra
tera zaḳhmi bhi to qismat ka sikandar Thahra
lazzat dard ki baḌhti hi chali aati hai
tarab-angez bahut ek hi nishtar Thahra
bhar ga.iin zehn men ra.ana.iyan ik jalve se
ho kahin jaise koi pariyon ka lashkar Thahra
kya shikast us ko bhala gardish-e-dauran degi
ḳhaak ka Dher hi jis ke liye bistar Thahra
meri mehman-navazi ka tha charcha aisa
jo bhi tufan-e-bala aaya mire ghar Thahra
ḳhasta-hali se jo bauna nazar aata tha tumhen
vaqt jab aaya to phir kitna qad-avar Thahra
nazr-e-jan rah-e-mohabbat men bahut asan hai
shart mere liye kuchh mushkil-o-bartar Thahra
gar umanD aa.e to gharqab na ho shahr tamam
ye jo ankhon men hai ashkon ka samundar Thahra
kaise ‘az.har’ kisi suraj ko salami dega
kyon na ho apne zamane ka qalandar Thahra
Leave a Reply