Dinesh Kumar Drouna
ḳhud se ḳhudi ke aib chhupana fuzul hai
yuun a.ine ko aankh dikhana fuzul hai
ehsas ko mazaq banana fuzul hai
tum ko to dil ki baat batana fuzul hai
paani se dil ki aag bujhana fuzul hai
ai shaḳhs ansuon men nahana fuzul hai
mumkin hai niind niind na ho kar bahana ho
vo so nahin raha to jagana fuzul hai
us ne jo Thaan hi li agar ḳhud-kushi ki to
phir to use usi se bachana fuzul hai
ham laakh tajrabon se yahi kah rahe hain ab
ik-tarfa rabt ho to nibhana fuzul hai
jalva-numa hain aap agar ḳhvab hi men to
phir to hamara hosh men aana fuzul hai
hai ye taqaza rasm-e-adab ka vagarna to
main janta huun haath milana fuzul hai
Leave a Reply