Qayyum Nazar
ḳhvahishon ki maut ka yaaro bhala chaha karo
phailti tarikiyon men chand ka charcha karo
be-mahaba jam hi jaa.en dard ki jab mahfilen
apne gham ko shahr-e-baḳht-e-na-rasa samjha karo
lahlahati vadiyon se ḳhub-tar hain reg-zar
dil ke sahra men gulistan ki faza paida karo
ranj ki gahra.iyon ki tah ko paane ke liye
doston ki dushmani ko bhi ata jaana karo
aqibat ki fikr na-danon ka hissa hi sahi
aqibat ke tazkire par barmala roya karo
talḳh-tar ho zindagi to lutf de shayad siva
na-shanasaon ki ḳhatir ashna DhunDa karo
kya se kya shaklen dikhata hai fareb-e-agahi
dasht-e-imkan se koi zarra uTha laaya karo
azmat-e-insan ke dukh men ghul raha hai ahd-e-nau
is masiha ke liye mil kar dua manga karo
ḳharch uThta hi nahin aur rang laata hai ghazab
be-gunah ke ḳhuun se bhi qashqa zara khincha karo
ḳhaak uḌti hai ki raushan husn ka anchal hua
chehra-e-giti ba-sad-bim-o-raja dekha karo
Leave a Reply