Rah Mein Ghar Ke Ishaare Bhi Nahin Niklenge

Shakeel Azmi

raah men ghar ke ishare bhi nahin niklenge

chand Duuba to sitare bhi nahin niklenge

Dubne ke liye sahil pe khaḌa huun main bhi

bandishen toḌ ke dhare bhi nahin niklenge

Thahar ai sail-e-ravan varna ye basti hi nahin

tere gharqab kinare bhi nahin niklenge

meri basti baḌi muflis hai magar ai hatim

log yuun haath pasare bhi nahin niklenge

tum ajab log ho angan ke liye rote ho

ab makanon men usare bhi nahin niklenge

raat bhar jaag ke ham ne jo kama.i ki hai

us se to din ke ḳhasare bhi nahin niklenge

tum bhi ‘ghalib’ ki tarah laakh jatan kar lo ‘shakil’

saare arman tumhare bhi nahin niklenge