ujala chhin raha hai raushni taqsim hoti hai
tiri avaz hai ya zindagi taqsim hoti hai
kabhi reg-e-ravan se pyaas bujh jaati hai rahrav ki
kabhi dariya ke hathon tishnagi taqsim hoti hai
yahi vo moḌ hai apne para.e chhuT jaate hain
qarib-e-ku-e-janan gumrahi taqsim hoti hai
ḳhushi ke naam par ankhon men aansu aa hi jaate hain
ba-qadr-e-gham mohabbat men ḳhushi taqsim hoti hai
yaqin aaya tire shadab paikar ki khanak sun kar
badan ke zaviyon men yuun hansi taqsim hoti hai
qayamat hai dilon ke darmiyan divar uThate ho
dilon ke dard ki hamsa.egi taqsim hoti hai
vahin kal vaqt ne khaa.i thi Thokar yaad hai ab tak
vo pech-o-ḳham jahan teri gali taqsim hoti hai
sar-e-pahna-e-naghma ‘shaz’ kuchh sho.ala sa uThta hai
suna hai daulat-e-paighambari taqsim hoti hai
Leave a Reply