Premi Romani
main kaun huun kya huun main yahi soch raha huun
surat men muqayyad huun magar bikhra hua huun
ta-hadd-e-nazar mere siva koi nahin hai
main jaise kisi dard ke sahra men khaḌa huun
ye baat miri soch se bahar hai abhi tak
main koh tha phir kaise samundar men baha huun
ye sach hai kisi ka huun main matlub na talib
hairan huun ki kis vaste duniya men jiya huun
be-bas huun main ai mujh se ziya mangne vaalo
main diip tha jalne se magar pahle bujha huun
‘premi’ mujhe is baat ka ḳhud ilm nahin hai
vo kaun hai main jis ke ḳhayalon men ghira huun
Leave a Reply