Poet
zamin se asman tak aa ga.e hain
chale hain to kahan tak aa ga.e hain
musafir in jhamelon men paḌen kyon
kahan se ham kahan tak aa ga.e hain
nazar ke samne vo astan hai
yaqin vaale kahan tak aa ga.e hain
hue hain baat karne par vo raazi
zahe qismat yahan tak aa ga.e hain
ḳhirad ki aḳhiri manzil vahi hai
junun vaale jahan tak aa ga.e hain
hui ik saans men tai ye masafat
makan se la-makan tak aa ga.e hain
ganva di zindagi bhar ki kama.i
gile nok-e-zaban tak aa ga.e hain
Leave a Reply