chalo kuchh to raah tai ho na chale to bhuul hogi
abhi band har gali hai jo khulegi tuul hogi
tire husn ki vadi.at miri jur.at-e-nazara
tire ru-ba-ru jhukegi to nazar ki bhuul hogi
mire ham-safar baḌhenge mujhe rasta bata kar
mire paanv se uḌi hai mire sar pe dhuul hogi
mujhe qibla-ru biTha kar mire haath uThane vaalo
ye yaqin bhi dila do ki dua qubul hogi
chalo maan len ye donon koi shai hai maslahat bhi
na sitam ka dil dukhega na vafa malul hogi
tira fan-e-qissa-goi abhi daar tak hi pahuncha
mire shauq ki kahani abhi aur tuul hogi
vo lahu ki dhaar ‘afzal’ jo hai qarz ḳhanjaron par
na karenge ham taqaza na kabhi vasul hogi
Leave a Reply