Farhat Qadri
raaz ubal paḌe aḳhir asman ke sinon se
rabt is zamin ko hai aur bhi zaminon se
kaun sa jahan hai ye kaise log hain is men
uThta hai dhuan har dam dil ke abginon se
har bashar hai fariyadi har taraf andhera hai
mehr-o-mah nahin nikle shahr men mahinon se
ik taraf zabanon par dosti ke na.are hain
ik taraf Tapakta hai ḳhuun astinon se
muflison ki basti men vus.aten hain duniya ki
aap utar ke dekhen to apni shah-nashinon se
na-ḳhuda ki himmat ka imtihan leti hai
varna kad nahin kuchh bhi mauj ki safinon se
tajrabon ki duniya men ahl-e-ilm-o-hikmat ko
rif.aten milin ‘farhat’ fikr-o-fan ke zinon se
Leave a Reply