pahle to shahar bhar men andhera kiya gaya
phir ham se raushni ka taqaza kiya gaya
pahle to sazishon se hamen di ga.i shikast
phir ḳhuub is shikast ka charcha kiya gaya
ik shaḳhs ke liye miri basti ka rasta
kachche makan gira ke kushada kiya gaya
pahle to mujh ko raah bata.i ga.i ghalat
phir meri gumrahi ka tamasha kiya gaya
duniya na thi jo pyaar ke qabil to kis liye
ham ko asir-e-ḳhvahish-e-duniya kiya gaya
is gulshan-e-hayat men rang-e-ḳhizan ke saath
ik mausam-e-bahar bhi paida kiya gaya
ankhon ko ansuon ke javahar diye ga.e
dil ke sipurd gham ka ḳhazana kiya gaya
duniya hamare qatl ko kahti hai ḳhud-kushi
marne ke ba.ad bhi hamen rusva kiya gaya
‘shahid’ likha gaya tha hamare hi ḳhuun se
tasnif jab vafa ka sahifa kiya gaya
Leave a Reply