dastar-e-ehtiyat bacha kar na aa.ega
koi bhi us gali se subuk-sar na aa.ega
bas ek jast aur sar-e-ku-e-justuju
phir raste men koi samundar na aa.ega
uḌ ja.enge hava men sabhi naqsh-e-na-tamam
aur mausam-e-hunar bhi palaT kar na aa.ega
kab tak rahoge zid ke ahate men ḳhema-zan
vo hadd-e-ehtiyat se bahar na aa.ega
yuun mutma.in hain raste sehn-e-sukut ke
jaise kabhi sadaon ka lashkar na aa.ega
jo kuchh hai vo bahut hai ki phir is navah men
ik lamha-e-sukun bhi mayassar na aa.ega
‘aḳhtar’ ab intizar ki parchha.iyan sameT
is dhuup men vo mom ka paikar na aa.ega
Leave a Reply