Saleem Betab
zindagi ne baḳhsha hai zahr-e-agahi mujh ko
kar diya gaya andha de ke raushni mujh ko
ḳhvab ka har ik shisha sau jagah se TuuTa hai
kis qadar paḌi mahngi a.ina-gari mujh ko
dusron se nafrat ka ḳhvab tak na dekhunga
dosto ḳhud apne se ishq hi sahi mujh ko
main jahan bhi huun lekin mutma.in to baiTha huun
tere rushd se behtar meri gumrahi mujh ko
is tarah to but ban kar mere paas mat tu baiTh
ḳhaar ban ke chubhti hai teri ḳhamushi mujh ko
ye mira muqaddar hai ya tiri shararat hai
kyuun lahu rulati hai teri dosti mujh ko
bas tujhe hi paane ko vaqf thi miri parvaz
le uḌa ḳhalaon men zauq-e-bandagi mujh ko
main ki din ka beTa huun raushni ugalta huun
kya bhala Dara.egi shab ki tirgi mujh ko
ḳhvab ke jaziron par giit kis tarah likkhun
har-qadam pe Dasti hai jab ki zindagi mujh ko
Leave a Reply