Aaina-Khana Karenge Dil-E-Nakaam Ko Hum

aina-khana karenge dil-e-nakam ko ham

pherenge apni taraf ru-e-dil-aram ko ham

shaam se subh talak daur-e-sharab akhir hai

rote hain dekh ke khandan dahan-e-jam ko ham

yaad rakhne ki jagah hai ye tilism-e-hairat

subh ko dekhte hi bhuul gae shaam ko ham

aankh vo fitna-e-dauran kise dikhlata hai

shoabada jante hain gardish-e-ayyam ko ham

fitna-angezi bhi chhupti hai kahin parde men

sunte hain gabr o musalman se tire naam ko ham

khun-e-qasid to vo saffak samajhta hai halal

kisi ghammaz se bhejvaenge paigham ko ham

paanv pakde hain zamin ne ye tire kucha ki

rah-e-sad-sala samajhte hain ab ik gaam ko ham

dida-e-yar kahen kya use kaif-e-mai men

bhuun kar roz gazak karte hain badam ko ham

beza-e-khat se hui us ki kudurat dah-chand

ab safai ke liye DhunDenge hajjam ko ham

yahi tahsil-e-mohabbat ka hai aalam ta-hal

pukhta karte hain hanuz arzu-e-kham ko ham

lutf hasil ho jo zulfon men giraftari ka

mol len dil ki asiri ke liye daam ko ham

kucha-e-yar men apna jo guzar hota hai

nigaran rahte hain hasrat se dar-o-bam ko ham

husn se ishq ki khatir hai khuda ne bheja

karte hain ‘atish’ use aae hain jis kaam ko ham

Leave a Comment