kuza-gar main tire kis ḳhvab ka chehra ho ja.un
sirf ik jism ki mohlat hai main kya kya ho ja.un
tujh men aur mujh men bas ik farq vafa hi ka hai
main agar tark vafa kar duun to tujh sa ho ja.un
mujh ko mere hi andhere ne chhupa rakkha hai
jo tiri zaat men aa ja.un sitara ho ja.un
sochte sab hain kahani to mukammal ho jaa.e
chahta koi nahin hai ki main us ka ho ja.un
chaar din qaid men rah kar ye tamanna bhi ga.i
pahle lagta tha ki ai kaash parinda ho ja.un
main to bas ek tasavvur huun vahi rahne de
aise bhi soch na mujh ko ki main chehra ho ja.un
sab ki ankhon men khaTakti hai hamari qurbat
shahr ka shahr laga hai ki akela ho ja.un
ishq men saara kamal asl men furqat ka hai
jo bhi ho jaa.e juda mujh se main us ka ho ja.un
Leave a Reply