Abr Ke Sath Hawa Raqs Mein Hai

abr ke saath hava raqs men hai

saare jangal ki faza raqs men hai

paanv tikte hi nahin ashkon ke

jaise ankhon ki dua raqs men hai

darmiyan chikhte nishanon ke

mera khamosh khuda raqs men hai

khokhla ped khada hai lekin

us ka ehsas ana raqs men hai

ab to un pairon ko ghairat aae

vo mira shoala-nava raqs men hai

ishq-e-pechan jo sutunon pe chadhi

ghar ki viran faza raqs men hai

khushbuen guunj rahi hain mujh men

aaj phulon ki sada raqs men hai

sab lakiron se lahu rista hai

yuun hatheli pe hina raqs men hai

nazar sailab hue ahl-e-makan

taaq par ab bhi diya raqs men hai

Leave a Comment