hamare naam se un ko mohabbaten kaisi
jo mar ga.e to kisi se shikayaten kaisi
ujaḌ ga.e hain haveli ke saare hangame
macha rakhi hain hava ne qayamaten kaisi
sarapa pyaar hain ham to vafa-parast bhi hain
ham aise shaḳhs ke dil men kuduraten kaisi
kabhi tu ḳhud hi ruton ka mizaj badlega
sitam ke zard dinon se baghavaten kaisi
dilon ka zahr umaDne laga hai baton men
har ek lafz se uryan hain nafraten kaisi
ḳhizan-rasida daraḳhton ke jism chhalni hain
hava-e-shahr ne ki hain shararten kaisi
ḳhud apne honT chabana hi un ki aadat hai
hamare dhyan ne di hain halavaten kaisi
sada-e-zarf to kanon men gunjti hi nahin
‘niyaz’ phir ye mohabbat men vahshaten kaisi
Leave a Reply