charagh-e-rah bujha kya ki rahnuma bhi gaya
hava ke saath musafir ka naqsh-e-pa bhi gaya
main phuul chunti rahi aur mujhe khabar na hui
vo shakhs aa ke mire shahr se chala bhi gaya
bahut aziiz sahi us ko meri dildari
magar ye hai ki kabhi dil mira dukha bhi gaya
ab un darichon pe gahre dabiz parde hain
vo tank-jhank ka maasum silsila bhi gaya
sab aae meri ayadat ko vo bhi aaya tha
jo sab gae to mira dard-ashna bhi gaya
ye ghurbaten miri ankhon men kaisi utri hain
ki khvab bhi mire rukhsat hain ratjaga bhi gaya
Leave a Reply