Arsh Siddiqui
hairan huun ki ye kaun sa dastur-e-vafa hai
tu misl-e-rag-e-jan hai to kyuun mujh se juda hai
tu ahl-e-nazar hai to nahin tujh ko ḳhabar kyuun
pahlu men tire koi zamane se khaḌa hai
likkha hai mira naam samundar pe hava ne
aur dono ki fitrat men sukun hai na vafa hai
main shahr-o-bayaban men tujhe DhunDh chuka huun
be-dard tu kis hajla-pinhan men chhupa hai
ham rakhte hain da.ava ki hai qaabu hamen dil par
tu samne aa jaa.e to ye baat juda hai
main dozaḳh-e-jan men bhi raha mahv-e-tag-o-taz
ai ḳhaliq-e-aflaq tujhe to ye pata hai
gham hai ki musalsal usi shiddat se hai jaari
yuun kahne ko is umr ka har lamha naya hai
har samt hava tez faza ta-ba-ufuq tang
dil zarra-e-sahra hai bagulon men ghira hai
kyuun jaage hue shahr men tanha hai har ik shaḳhs
ye raushni kaisi hai ki saaya bhi juda hai
ai davar-e-mahshar tujhe ḳhud teri qasam hai
insaf se kah dil kabhi tera bhi phaTa hai
mahsus kiya hai kabhi tu ne bhi vo ḳhanjar
gham ban ke jo har shaḳhs ke siine men gaḌa hai
Thahra.e use ‘arsh’ koi kaise jafa-kesh
jo mujh se alag rah ke bhi hamrah chala hai
Leave a Reply