Ratjagon Ka Zawal

vo andheri raat ki chaap thi

jo guzar gai

kabhi khidkiyon pe na jhuk saki

kisi raste men na ruk saki

use jaane kis ki talash thi

miri aankh os se tar rahi hai

mujhe khvab banne ki lat rahi

kabhi ek suuni si rahguzar pe khada tha main

kabhi duur rail ki ptriyon pe pada tha main

vo kisi ke jism ki chaap thi

jo guzar gai

use jaane kis ki talash thi

mire dil ke dasht ki ret hi men khili thi vo

mujhe ik gali men mili thi vo

use mujh se shauq-e-visal tha

mire khvab mujh se khafa hue

mujhe niind aai main so gaya

yahi ratjagon ka zaval tha

Leave a Comment