us ki tasvir ko siine se lagata hi nahin
haan main vo shaḳhs huun jo ishq jatata hi nahin
us ko kab se hai tavaqqo.a ki bula.unga main
main hi masruf huun itna ki bulata hi nahin
ek sach ye hai ki us ne hi kiya hai barbad
ek ye bhi hai ki vo zehn se jaata hi nahin
mere kamre ki to aadat hai bikhar jaane ki
main yahi soch ke kamre ko sajata hi nahin
ḳhauf lagta hai mujhe raushni men jaane se
shaam ke vaqt bhi main sham.a jalata hi nahin
hijr ke baad se us ne na racha.i mehndi
main bhi ab jhaT se koi phone uThata hi nahin
Leave a Reply