Jahaalat Ka Manzar Jo Rahon Mein Tha

jahālat kā manzar jo rāhoñ meñ thā

vahī besh-o-kam dars-gāhoñ meñ thā

jo ḳhanjar-ba-kaf qatl-gāhoñ meñ thā

vahī vaqt ke sarbarāhoñ meñ thā

ajab ḳhāmushī us ke hoñToñ pe thī

ajab shor us kī nigāhoñ meñ thā

use is liye maar Daalā gayā

ki vo ziist ke ḳhair-ḳhvāhoñ meñ thā

hamārī nazar se vo kal gir gayā

jo kal tak hamārī nigāhoñ meñ thā

vo kyā detā ‘aḳhtar’ kisī ko panāh

jo ḳhud umr bhar be-panāhoñ meñ thā

Leave a Comment