kisi ki ishva-gari se ba-ghair-e-fasl-e-bahar
sabhi ka chaak gireban hai dekhiye kya ho
tumhen ḳhabar hi nahin ai tuyur-e-naghma-sara
yahi chaman yahi zindan hai dekhiye kya ho
jahan kashud-e-nava par ḳhizan ke pahre hain
vahin bahar-e-ghazal-ḳhvan hai dekhiye kya ho
subu uTha ki ye nazuk maqam hai saaqi
na ahrman hai na yazdan hai dekhiye kya ho
ravan hai mauj-e-gul-o-lala mauj-e-ḳhun ki tarah
chaman shahid-e-baharan hai dekhiye kya ho
darazi-e-shab-e-hijran se mujh ko ḳhauf na tha
kisi ki zulf-e-pareshan hai dekhiye kya ho
hava ka rang ye hai ashiyan to ek taraf
qafas bhi shaḳh pe larzan hai dekhiye kya ho
yahi hai dil se shikayat ki mera mahram-e-raz
mujhi se dast-o-gireban hai dekhiye kya ho
hamin hain pir-e-mughan kafiron ke ai ‘abid’
hamin ko dava-e-iman hai dekhiye kya ho
Leave a Reply