Kisi Ki Ishwa-Gari Se Ba-Ghair-E-Fasl-E-Bahaar

kisī kī ishva-garī se ba-ġhair-e-fasl-e-bahār

sabhī kā chaak girebāñ hai dekhiye kyā ho

tumheñ ḳhabar hī nahīñ ai tuyūr-e-naġhma-sarā

yahī chaman yahī zindāñ hai dekhiye kyā ho

jahāñ kashūd-e-navā par ḳhizāñ ke pahre haiñ

vahīñ bahār-e-ġhazal-ḳhvāñ hai dekhiye kyā ho

subū uThā ki ye nāzuk maqām hai saaqī

na ahrman hai na yazdāñ hai dekhiye kyā ho

ravāñ hai mauj-e-gul-o-lāla mauj-e-ḳhūñ kī tarah

chaman shahīd-e-bahārāñ hai dekhiye kyā ho

darāzi-e-shab-e-hijrāñ se mujh ko ḳhauf na thā

kisī kī zulf-e-pareshāñ hai dekhiye kyā ho

havā kā rañg ye hai āshiyāñ to ek taraf

qafas bhī shāḳh pe larzāñ hai dekhiye kyā ho

yahī hai dil se shikāyat ki merā mahram-e-rāz

mujhī se dast-o-girebāñ hai dekhiye kyā ho

hamīñ haiñ pīr-e-muġhāñ kāfiroñ ke ai ‘ābid’

hamīñ ko dāvā-e-īmāñ hai dekhiye kyā ho

Leave a Comment