Wahshat Raza Ali Kalkatvi
main ne maana kaam hai naala dil-e-nashad ka
hai taghaful sheva aḳhir kis sitam-ijad ka
haa.e vo dil jo hadaf tha navak-e-bedad ka
dard sahta hai vahi ab ghaflat-e-sayyad ka
nargis-e-mastana men kaifiyat-e-jam-e-sharab
qamat-e-rana pe aalam misra-e-ustad ka
mana-e-fariyad hai kuchh tab.a ki afsurdagi
kuchh sukut-amoz hai pas-e-adab sayyad ka
is qadar dilkash raha tera agar andaz-e-jaur
zaḳhm-e-dil munh chuum lega ḳhanjar-e-bedad ka
majlis-e-matam bani aane se un ke bazm-e-aish
paḌ gaya phulon men mere ghul mubarakbad ka
tu na kar tark-e-sitam zalim sitam ho ja.ega
jaan se ja.ega ḳhugar lazzat-e-bedad ka
dard-e-nakam-e-hujum-e-arzu ka hai ma.aal
talḳhi-e-hasrat natija shauq-e-ulfat-zad ka
hasrat-afza hai bahut mere dil-e-viran ka jaal
kaun hai farman-rava is mulk-e-ghair-abad ka
lutf hi aata raha hai sa.i-e-batil men mujhe
hai yahan afsos kis ko mehnat-e-barbad ka
khinch kar le chal mujhe shauq-e-asiri su-e-dam
kaam aisa kar ki jis se ji baḌhe sayyad ka
kis ko shikva hijr ka aur kis ko hasrat vasl ki
lutf-parvarda hai mera dil kisi ki yaad ka
ye ada-e-dil-rubayana ye andaz-e-haya
kis tarah phir kaam karti hai nazar jallad ka
‘vahshat’ us but ne taghaful jab kiya apna shi.ar
kaam ḳhamoshi se main ne bhi liya fariyad ka
Leave a Reply