dariche par diye rakhe hue hain
andhere kamre ko ghere hue hain
agar main dhuup men tanha khaḌa huun
to itne saa.e kyon ubhre hue hain
har ik insan achchha lag raha hai
ham apne aap se ruThe hue hain
dukhi hai jab se sayyadon ki Toli
parindon se shajar lipTe hue hain
lage hain saste apne aap ko ham
nazar men sab ki jab mahnge hue hain
ye hijrat sirf hijrat hi nahin hai
hamari ruuh ke TukḌe hue hain
Leave a Reply