ishq hai yaar ka khuda-hafiz
amr-e-dushvar ka khuda-hafiz
pech mujh par pade jo padna ho
zulf-e-khamdar ka khuda-hafiz
sar jo takrata huun to kahte hain
meri divar ka khuda-hafiz
sarfaroshon ki chashm-e-bad na pade
un ki talvar ka khuda-hafiz
dafn ham ho chuke to kahte hain
is gunahgar ka khuda-hafiz
dasht chhuta to ablon ne kaha
yaan ke har khaar ka khuda-hafiz
baat karne men hont ladte hain
aise takrar ka khuda-hafiz
bulbulen qaid-e-baghban ghafil
gul-e-zardar ka khuda-hafiz
gar ‘sakhi’ ko hai ishq ka azar
aise bimar ka khuda-hafiz
Leave a Reply