jo kuchh ki hai duniya men vo insan ke liye hai
arasta ye ghar isi mehman ke liye hai
zulfen tiri kafir unhen dil se mire kya kaam
dil kaaba hai aur kaaba musalman ke liye hai
ho qaid-e-tafakkur se kab azad sukhan-var
manzur qafas murgh-e-khush-alhan ke liye hai
apnon se na mil apne hain sab apnon ke dushman
har nai men bhari aag nistan ke liye hai
kuchh bakht se mere jo siva hai vo siyahi
baaqi hai to meri shab-e-hijran ke liye hai
divana huun main bhi vo tamasha ki mira zikr
goya sabaq atfal-e-dabistan ke liye hai
hai bada-kashon ke liye ik ghaib se taid
zahid jo dua mangta baran ke liye hai
changul men hai muuzi ke dil us chashm ke hathon
ghera ye ghazab panja-e-mizhgan ke liye hai
main kis ki nigahon ka huun vahshi ki miri khaak
ik kohl-e-basar chashm-e-ghazalan ke liye hai
dil bhi hai bala qabil-e-mashq-e-sitam-o-naz
jo tiir hai us tuda-e-tufan ke liye hai
nikle koi kya qaid-e-alaiq se ki ai ‘zauq’
dar hi nahin is khana-e-zindan ke liye hai
Leave a Reply