abdul-majeed-salik

Charagh-e-Zindagi Hoga Farozan Hum Nahin Honge

charagh-e-zindagi hoga farozan ham nahin honge

chaman men aaegi fasl-e-baharan ham nahin honge

javano ab tumhare haath men taqdir-e-alam hai

tumhin hoge farogh-e-bazm-e-imkan ham nahin honge

jiyenge jo vo dekhenge baharen zulf-e-janan ki

sanvare jaenge gesu-e-dauran ham nahin honge

hamare Dubne ke baad ubhrenge nae taare

jabin-e-dahr par chhatkegi afshan ham nahin honge

na tha apni hi qismat men tulu-e-mehr ka jalva

sahar ho jaegi sham-e-ghariban ham nahin honge

agar maazi munavvar tha kabhi to ham na the hazir

jo mustaqbil kabhi hoga darakhshan ham nahin honge

hamare daur men Dalin khirad ne uljhanen lakhon

junun ki mushkilen jab hongi asan ham nahin honge

kahin ham ko dikha do ik kiran hi timtimati si

ki jis din jagmagaega shabistan ham nahin honge

hamare baad hi khun-e-shahidan rang laega

yahi surkhi banegi zeb-e-unvan ham nahin honge

More Poems

Leave a Comment