ghair ke ghar hain vo mehman baḌi mushkil hai
jaan jaane ke hain saman baḌi mushkil hai
kahte hain aap hain jis baat ke talib ham se
hai vahi ghair ko arman baḌi mushkil hai
aur phir kis se kahun hal-e-pareshani-e-dil
tum to hote ho pareshan baḌi mushkil hai
be-mile kaam bhi chalta nahin milna bhi zarur
ghair se jaan na pahchan baḌi mushkil hai
us ne li jaan hazaron ki ye dam de de kar
ham pe marna nahin asan baḌi mushkil hai
vo uTha lete hain ye rakh rakh ke chhuri gardan par
kaam hota nahin asan baḌi mushkil hai
raz-e-dil us but-e-bad-ḳhu se kahun ya na kahun
baat nazuk hai vo nadan baḌi mushkil hai
roz kahte ho ki tu kis ke liye hai betab
jaan kar bante ho anjan baḌi mushkil hai
dosti sahal nahin us but-e-bad-ḳhu se ‘nasim’
zid na kar dekh miri jaan baḌi mushkil hai
Leave a Reply