Farooq Anjum
parinde khet men ab tak paḌav Daale hain
shikari aaj tamasha dikhane vaale hain
hava.en tez hain andhi ne par nikale hain
bahut udaas patangen uḌane vaale hain
kamand phenk na dena zamin ki vus.at par
na.e jazire samundar ne phir uchhale hain
chalo ke dekh len ‘ghalib’ ke ghar ki divaren
na.i ruton ne bayaban men Dere Daale hain
gali gali men chamakti hai dard ki ḳhushbu
hamare zaḳhm mahakte hue ujale hain
ab apne aap se milne ki justuju kya ho
tumhare shahr ke sab aa.ine to kaale hain
jo log vaqa.i munsif-mizaj hain ‘anjum’
suna hai aaj vo chehre badalne vaale hain
Leave a Reply