Jagat Mohan Lal Ravan
gul-e-virana huun koi nahin hai qadr-dan mera
tu hi dekh ai mire ḳhallaq husn-e-ra.egan mera
ye kah kar ruuh nikli hai tan-e-ashiq se furqat men
mujhe ujlat hai baḌh jaa.e na aage karvan mera
hava us ko uḌa le jaa.e ab ya phunk de bijli
hifazat kar nahin sakta miri jab ashiyan mera
zamin par baar huun aur asman se duur ai malik
nahin malum kuchh aḳhir Thikana hai kahan mera
mujhe naghme ka lutf aata hai raton ki ḳhamoshi men
dil-e-bashikasta hai ik saz-e-ahang fughan mera
vahin se ibtida-e-kucha-e-dildar ki had hai
qadam ḳhud chalte chalte aa ke ruk jaa.e jahan mera
zara duur aur hai ai kashti-e-umr-e-ravan sahil
ki is bahr-e-jahan men har nafas hai badban mera
hui jaati hai tanha.i men lazzat ruuh ki zaa.e.a
luTa jaata hai virane men ganj-e-sha.egan mera
anasir hanste hain duniya ki vus.at muskurati hai
kisi se puchhte hain ahl-e-binash jab nishan mera
mire ba.ad aur phir koi nazar mujh sa nahin aata
bahut din tak rakkhenge sog ahl-e-ḳhandan mera
ghanimat hai nafas do chaar jo baaqi hain ab varna
kabhi ka luT chuka sarmaya-e-sod-o-ziyan mera
abhi tak fasl-e-gul men ik sada-e-dard aati hai
vahan ki ḳhaak se pahle jahan tha ashiyan mera
‘ravan’ sach hai mohabbat ka asar zaa.e.a nahin hota
vo ro dete hain ab bhi zikr aata hai jahan mera
Leave a Reply