vo badan phuul ki bahon men pala ho jaise
is qadar narm ki ḳhvabon men Dhala ho jaise
zindagi TuTte shishon ki sada ho jaise
zindagi kanpte honTon ki dua ho jaise
is tarah dil men tiri yaad ki ḳhushbu aa.i
dasht-e-viran men koi phuul khila ho jaise
jab mulaqat hui un se to yuun hans ke mile
koi shikva na shikayat na gila ho jaise
zindagi di hai dilon ko mire giton ne ‘shahab’
meri avaz haqa.eq ki sada ho jaise
Leave a Reply