Mansoor Khushtar
jahan se ab guzarna chahte hain
ki ham jannat men rahna chahte hain
tavajjoh aap farma.en agar to
kuchh ham bhi arz karna chahte hain
zara tegh-e-nigah ko tez kiije
ki ham bhi kuchh taḌapna chahte hain
chhupa rakkhi jo hai vo jaam de de
vahi pi kar bahakna chahte hain
maza ashiq ko is men bhi hai milta
jafa.en teri sahna chahte hain
hue hain tang is duniya se aise
bila-taḳhir marna chahte hain
varaq ‘ḳhushtar’ kitab-e-zindagi ka
koi taaza ulaTna chahte hain
Leave a Reply