Ghubar-E-Ehsas-O-Pesh-O-Pas Ki Agar Ye Barik Tah haTaen

ghubar-e-ehsas-o-pesh-o-pas ki agar ye barik tah haTa.en

to ek pal men na jaane kitne zamanon ke aks tharthara.en

ḳhizan agar apna ḳhuun na baḳhshe to fasl-e-gul kaise surḳh-ru ho

sukut apna jigar na chire to kaise jhankar den sada.en

bikhar chale hain bikhar chuke hain gul-e-ibarat ke barg-reze

kitab-e-jan ki shahadaton ka varaq varaq le ga.iin hava.en

hua ki be-rang taḳhtiyon par sada ki tahrir kya ubharen

sukut ke be-nishan khanDar men charagh-e-avaz kya jala.en

ye shauq ki be-nasib kaliyan ye dard ke be-ḳhizan shagufe

tumhare qadmon men rakh na paa.e to kis ki chaukhaT pe ja gira.en

hava ki talvar chal rahi ho to shaḳh-e-ummid kya sambhalen

badan ki divar gir rahi ho to dil ki divar kya bacha.en

tamasha-gah-e-tarab-nishan men sabhi ko lazim hai muskurana

jo gham-faroshi na karna chahen vahi yahan baḳht azma.en

muhib raton men Dagmagate dukhi badan ke musafiron ko

akele-pan men Dara rahi hai samay ke jangal ki saa.en saa.en

tamam alfaz mar chuke hain tamam ahbab ja chuke hain

ga.i ruton ke sitam ka qissa suna.en kaise kise suna.en