Basheer Ahmad Basheer
aisa tah-e-aflak ḳharaba nahin koi
us dasht se zinda kabhi lauTa nahin koi
haibat vo sadaon men ki larze dar-o-divar
guzre vo shab-o-roz ki soya nahin koi
viran si viran hui dhyan ki basti
chehra kisi chilman se jhalakta nahin koi
sar phoḌ ke lauT aati hai jaati hai jo avaz
kya gumbad-e-afaq men rasta nahin koi
ik aisi masafat hai ki saa.at bhi kaThin hai
sadiyon ka safar aur kahin saaya nahin koi
be-ism nahin khulta dar-e-ganj-e-tilismat
satron men ḳhazine hain tamasha nahin koi
dekhi hai ‘bashir’ ahl-e-nazar ki bhi rasa.i
baten miri samjhe mujhe samjha nahin koi
Leave a Reply