Ravish Siddiqi
ishq ki sharah-e-muḳhtasar ke liye
sil ga.e honT umr-bhar ke liye
zindagi dard-e-dil se katra kar
dard-e-sar ban ga.i bashar ke liye
dil azal se hai sho.ala pairahan
sham.a jalti hai rat-bhar ke liye
us ne dil toḌ kar kiya irshad
ab tasalli hai umr-bhar ke liye
abr-e-rahmat hai ishq ka daman
atish-e-razm ḳhair-o-shar ke liye
ham bhi ku-e-butan ko jaate hain
ai saba qasd hai kidhar ke liye
vo tajalli hai muntazir ab tak
kisi sha.ista-e-nazar ke liye
ḳhun-e-dil sarf kar raha huun ‘ravish’
ḳhuub se naqsh-e-ḳhub-tar ke liye
Leave a Reply